बहुरङ्गको प्रदेशमा प्रवेश

बहुरङ्गको प्रदेशमा प्रवेश

 -समदर्शी काइँला 

 अजायबघरको अ-मान्छे !

 नेपालीब्याचलर 'सिमसारको राजदूत' हुन खोज्दछ

उन्यू फुलेको हरियो उँधौलीउँभौली समय-

 कि म लाग्दछु अब मेन्छ्याम कोक्माको डिलैडिल !

आकाशगंगाको तीरैतीर !

एक बगल कर्याङकुरुङसितै-

मनचरी उड्छ दसगजापारि दसगजावारि ! 

 अ-कथाको कथा दन्त्यकथाजस्तो 

 गाउँखाने कथाले गाउँ नै खाएजस्तो

 बेगाउँ भएर 'म'

बहुरङ्गको प्रदेशमा-

ऐन्द्रिक संवेदनले  प्रवेश गर्छु,

 र भन्छु-

फिस्टो र फिस्टीले

महिनौं लगाएर कालकूटको बोटमा

न्यानूगुँड बनाए ।   

राती आयो एकाएक

तानाशाहजस्तो ठूलो बहुलाहा आँधीबेहरी !

अनि बिहान हेर्दा देखिनँ मैले

फिस्टो र फिस्टी, कालकूटको बोट

र, उनीहरुले बनाएको गुँड !

 केवल हिउँको चीसो शोचनदी !

उनीहरुको तात्तातो सम्झनामा

 निरन्तर  बगिरहेछ....बगिरहेछ........ 

 त्यो डाह खप्न नसकी

छटपटीले  हामी

तेहीँ कालकूट हलाहल पिएर  गोसाईकुण्डमा  अझैं सुतिरहेका छौं।